আঞ্চলিক_ভাষায়_ছড়া

ঠাশঠাশাইয়া ঠাডা মারে
জান খাফে ডরে,
কুলা জাগাত ঠাডা ফইরা
বউত মানুষ মরে।
সব থাইক্কা বেশি ঠাডা
সুনামঞ্জ (সুনামগঞ্জ) অয়,
ই খতা আমার না
টিবিটুবিত খয়।
মাইনষে মাতে ম্যাগনেটের
মৌজা ফিলায় বানাইয়া,
ব্রিটিশরায় ই ফিলারে
ঠাডা রাকত খমাইয়া।
ইতা ফিলার মাইনষে বুলে
চুরি খইরা নিছে,
বউত মানুষ ইতার দায়
ঘুরছে চুরের ফিছে।
মৌজা ফিলার না থাখনে
ঠাডা গেছে বাইরা,
খেউ জানে না ইতা ফিলার
নিছে কিতা খইরা।
ঠাডা লইয়া আরেখজাত
খথা হুনা যায়,
মোবাই ফনের টাওয়ার বেশি
ঠাডা, বারছে এর দায়।
জলবায়ু বদলি গেছে
কিছু মাইনষে খয়,
মেগে মেগে ডেক্কা লাগে
এরদায় ঠাডা অয়।
খেডায় কিতা খয় ইতা
হুইন্না লাভ নাই,
ঠাডা থাইক্কা কিলা বাছতাম
ই সমাদান চাই।
গবেষণা অওয়া দরখার
বারছে খেরে ঠাডা,
মেগ দেখলে ডরাইয়া আমরার
জান অই যায় ডাডা।
আফাদত বাছতে গিয়ে
সমাদান তুকাই,
দুইছাইট্টা উফায় মাইনষের
মুকে মুকে ফাই ।
তাল গাছ বেশি খইরা
লাগানি দরখার,
উছা গাছ থাখলে ঠাডা
মাডিত ফরে না আর।
বাইদলা দিনো সাবদানে
চলন লাগব অনে,
সুনামঞ্জও ঠাডা বেশি
জানে হখল জনে।